Ոչ մի օր առանց բանաստեղծության

ԱՐԱՄԱՅԻՍ ՍԱՀԱԿՅԱՆ

«Ի՞նչ իմանաս ով կլինի»

Ի՞նչ իմանաս ո՞վ կլինի

Հարևանը... քո շիրիմի:

Գուցե մեկը, ում տենչացել,

Բայց երբևէ չե՞ս մոտեցել:

Գուցե նաև մի անծանո՞թ,

Որ մի՛շտ պիտի մնա քեզ մոտ:

Գուցե նաև մի աշակերտ -

Հավե՜րժ դասի նստած քեզ հետ:

Գուցե մեկը, որին դիմել -

Իր մոտ գործի չի՞ ընդունել:

Գուցե նաև մի թշնամի՞,

Որ արդեն հաշտ պիտի լինի:

Իսկ սիրելիդ ամենամոտ

Գուցե հանգչի ուրիշի մոտ...

Կյանքը կարճ է, մահը երկար,

Իրար նայենք մտերմաբար:

Ի՞նչ իմանանք ո՞վ կլինի

Հարևանը մեր շիրիմի:

#Պոեզիա #Ոչմիօրառանցբանաստեղծության #ԱրամայիսՍահակյան