Բագրատունի - Աշուն է նորէն

Աշուն է նորէն

Աշուն է նորէն: Բաց պատուհանէս՝

Կը նայիմ խաղաղ ծառերուն տրտմած,

Որոնք թեւերնին հովերուն տըւած

Կարծես կը փնտռեն յոյսերնին կորած:

Աշուն է նորէն: Կը նայիմ այնպէս՝

Ինչպէս ծառերն այս տրտում, մերկացած,

Երազներուս վառ ու խնդումերես,

Որոնք անցեալին թողի՛ն զիս անդարձ...:

Երազներն իմ վառ, երէկ էի ես՝

Ձեզմով յուսավառ, ծառ մշտադալաչ...

Այսօր՝ մերկացած ու տրտումերես,

Կը նայիմ հեռո՜ւն... անձկութեամբ հազար:

Աշուն է նորէն: Խաղաղ, անընկեր,

Բաց պատուհանիս ետեւ ես կանգնած

Կը նայիմ երկինք... երկի՛նք կ'անձրեւէր

Արցունքները իր աշնան վաղահաս...:

© Բագրատունի