Ոչ մի օր առանց բանաստեղծության

ԲԱԳՐԱՏՈՒՆԻ

Երգ հրաժեշտի

Ուշ գիշեր է, ծովին դիմաց,

Կ'ընեմ հաշիւը իմ կեանքին...:

Անցեալս հիմա ինչպէս աւազ

Փռուած է ծով կեանքի շուրթին...:

Ուշ գիշերին, ծովին դիմաց,

Ինքզինքիս հետ կը խօսակցիմ:

Գիրք մը ինչպէս սիրտըս բացած

Կը թերթատեմ օրերը հին...:

Ուշ գիշերին, ծովին դիմաց,

Թերթերն հատ հատ այս ճոխ գրքին

Կը պատառեմ խանդավառուած

Ու կը նետեմ հովին գրկին...:

Ի՜նչ նազանքով՝ թերթերն հատ հատ

Շուրջ-պարեցին, դողդողացին,

Երգ ու արցունք իրար խառնած

Մութ ալիքները գրկեցին...:

Ուշ գիշերին, ծովին դիմաց

Թառած պատին այս հին վանքին

Ինչպէս արծիւ թեւեր պարզած

Կ'երգեմ երգը Հրաժեշտին: