Ոչ մի օր առանց բանաստեղծության

ՎԱՀՐԱՄ ՀԱՃՅԱՆ

Աշխարհում մի մարդ է մահացել

Աշխարհում մի մարդ է մահացել,

Սարսուռ է, տագնապ է, տխրություն,

Աշխարհից մեկն էլ է պակասել,

Շիրիմ է, խավար է, լռություն:

Աշխարհում մի մարդ է մահացել,

Փշրված երազներ ու ցասում,

Աշխարհը մի քիչ էլ՝ որբացել,

Արցունքը հոգին է ակոսում:

Աշխարհում մի մարդ է մահացել,

Հույսերի, հույզերի խլրտում,

Մի սիրտ էլ՝ կարոտով հեռացել,

Կարոտի նորաշունչ մրրկում:

Աշխարհում մի մարդ է մահացել,

Տարիներ և հուշեր անհատակ,

Աշխարհը իր ցավն է մոռացել,

Աղոտվող, մոռացվող հիշատակ: